Berriak
Atzealdea

Empar Pineda Erdozia aktibista hernaniarraren biografia argitaratu dute Udalak eta Berdintasun Kontseiluak

Kattalin Miner idazle hernaniarrari amua bota zioten Udalak eta Berdintasun Kontseiluak Empar Pineda Erdozia militante feministaren bizitza kontatzeko, eta amuari heldu zion Minerrek, gustu handiz, gainera. "Empar Pineda Erdozia. Gorputzak hala eskatua" elkarrizketa-liburua da horren emaitza, "Emparrek bere bizitza, bere istorioa, bere ikuspuntutik kontatzea iruditu zitzaidalako interesgarria", esan du Minerrek. Gaur izan da liburuaren aurkezpena eta bertan egon dira Empar Pinedaren senitartekoak, etxekoari babesa adierazten.

2020·12·16


Emakumeen oroimen historikoa berreskuratze bidean, hainbat egitasmo jarri ditu martxan azken urteotan Berdintasun Kontseiluak eta Hernaniko Udaleko Berdintasun Arloak, Hernaniko emakumeen historia jaso, aitortu eta zabaltzera emateko asmoz. Ildo horretatik doa Empar Pineda Erdoziaren (Hernani, 1944) inguruko lan hau ere.

Hernanin jaiotako emakume hau erreferentea da emakumeen eskubideen aldeko borrokan, diktadura frankistatik eta gaur egunera arte. Aipagarria da lesbianismoaren ikusgarritasunaren alde eta abortu eskubidearen aldeko borrokan egindako lana. Hori dela eta, garrantzitsua iruditzen zaigu haren bizitzaren berri ematea, emakume honen ekarpena bereziki belaunaldi berriengana iristeko.

Kattalin Miner idazle hernaniarrak idatzi du liburuxka eta bi bertsio argitaratu dira, bata euskara hutsean eta bestea, elebitan (euskaraz eta gaztelaniaz). Gaztelaniazko itzulpena Danele Sarriugartek egin du. Ilustrazioak Maddi Zumalabe eta Jon Arangurenenak dira. Liburua Elkar liburudendan eta Plaza Feministan dago eskuragarri, 8 (euskaraz) eta 10 (elebitan) euroko prezioan.