2024·07·17
Aurtengo Uda Parkean uztailaren 25etik 27ra izango da Ave Marian. Aurtengorako, 10 jarduera antolatu dituzte Hernaniko Udaleko Kultura, Jarduera Fisikoa eta Kirola, eta Haur, Nerabe eta Gazteria sailek elkarlanean. Gaur aurkeztu dute, hain zuzen ere, egitarau hori.
Aitor Huizi Kultura zinegotziak Uda Parkean jaialdi “berezia” dela aitortu du: “Ikasturtean zehar kultur programazio handia izaten da Hernanin, baina udan gutxitu egin izan da, uste izaten dugulako herritarrez hustutzen dela Hernani. Baina hori ez da horrela: hernaniar asko geratzen dira udan herrian eta horientzako programazio interesgarria sortu nahi izan dugu. Bide batez, horrela kultur programazioa urte osora zabaltzea lortzen dugu”.
Horrez, gain, Huizik “Ave Maria bezalako espazio natural bat kultur plaza” bihurtzearen garrantzia azpimarratu du. “Uda kulturaz aire librean gozatzeko garai aproposa da. Gainera, herrigunean ditugun natur guneak aprobetxatuz egiten badugu, oraindik hobeto”.
Zirkuko bi emanaldi izango dira
Adin-tarte guztientzako moduko egitaraua da aurtengoan ere osatu dena: haurrek, familiek eta helduek gozatzeko modukoa. Agurtzane Aizpuru Kultura teknikariak eman ditu horien inguruko azalpenak.
Jolasak, antzerkia, zirkua, dantza eta musika emanaldiak izango dira Uda Parkean-en. Aizpuruk “zirkuko bi emanaldiak” aipatu ditu aurtengo nobedadeen artean. Capicua Aragoiko konpainiak Nüshu eskainiko du, arroparen merkatuaren inguruko hausnarketa bat. La Trocolaren REM, berriz, oso zirku fisikoa izango da, beldurren ingurukoa.
Aldapeko Basque Latin Jazzen kontzertua ere izango da. Sanjoanetako preludioan oholtza gainean ikusi genuen Hernaniko taldea pare bat kanturekin. Oraingoan, saio osoa eskainiko dute, euren bigarren diskoa kaleratu baitute.
Aniztasunak ere izango du tokia Uda Parkean-en. Honela, Donostiako Verdini dantza taldeak itxiko du aurtengo egitaraua.
Ekitaldi guztiak dohainik izango dira.
EGITARAUA, hemen.