Udazkeneko Emakumeentzako Jabetze Eskolako izen ematea zabalduko da irailaren 11tik 22ra
2023·08·30
Udazken honetan ere ikastaro mordoxka izango dira emakumeentzako, Kulturarteko Plaza Feministan. Ikastaro hauetan, askotariko gaiak landuko dira, besteak beste: osasuna eta gorputzaz ariko gara, klimaterioa eta menopausiaz, edota hilekoaz (10-14 urte bitarteko neskentzat); indarkeria matxistari aurre egiteko lanean, autodefentsa feminista ikastaroa eginen da; amatasuna eta sexualitateaz; ezagutza feministan sakontzeko, emakume filosofoen ekarpena ezagutzeko ikastaroa; kultura birdenitzeko ahaleginean, munduko emakumeen literatura eta batukada feminista izango dira. Bestalde, emakumeen nortasuna eta autonomia suspertzeko, etxeko ekonomiaren inguruko tailer berri bat izango da. Azkenik, gorputzetan arreta jartzeko hainbat proposamen egonen dira: batetik, nork bere burua zaintzeko eta ahalduntzeko, mindfulness eta yoga tekniketan oinarritutako tailer bana; bestetik, gorputzak dantzan jartzeko, adineko emakumeei zuzendutako tailerra.
Orotara, 11 tailer izango dira eta izen ematea, irailaren 11tik 22ra izango da. Ohiko bideetatik, bai on-line izen ematea beteta, bai telefonoz edo emailez idatzita, bai Kulturarteko Plaza Feministara etorrita.
Ikastaro hauetan irakasle lanetan arituko dira: Juncal Alzugaray Zurimendi, Saioa Hernandez Castro (SexuenArt Elkartea), Clara Wolfram Perez, Txaro Unzilla Atxotegi, Marisa Hurtado Caballero, Mertxe Tranche Iparragirre, Arantxa Albizu Escobar, Ainara Sarasketa Alberdi, Renata Gonzalez Villaseñor, Su Hernandez Aparicio eta Emagin Elkarteko kideak.
Bestalde, Emakumeentzako Jabetze Eskolei hasiera emateko, urtero legez, kultur proposamen bat antolatu da, HITZ ESANA, poesia-emanaldia, Mejillon Tigre kolektiboak sortua. Irailaren 22an izango da, 22:00etan, Leokako labaderoan. Halere, euria egingo balu, irailaren 29an izango da.
Kontakturako: 943 33 70 17 / kulturartekoplazafeminista@hernani.eus.