Tokiko Garapena ORRIA

Tokiko garapena

Ekonomia sozial eta eraldatzailea

Ekonomia Sozial eta Eraldatzailea sektore ekonomiko bat baino, ezaugarri, arau eta logika propio eta berezituak dituen eredu ekonomiko bat da, sektore ekonomiko (1go sektorea; 2. sektorea; 3. sektorea) guztietan, eta ziklo ekonomikoaren fase guztietan (finantzak, ekoizpena, banaketa, merkaturatzea, kontsumoa) garatzen den eredua, alegia.

Eredu honetan enpresaren jabetza langile guztien esku dago, eta, ondorioz, erabakiak hartzeko modua zeharo demokratikoa da, langile bat bozka bat. Bestetik, ekonomia eraldatzailean diharduten enpresen jarduna bideratuta dago egungo sistemak aurkezten dituen botere harremanak iraultzera eta, horren ordez, burujabetza prozesuak (elikadura, zaintza, komunikazioa, energia, etab...) sustatzeko helburu argia du.

Zer bilatzen da?
- Eredu honetan oinarrituko diren enpresa gehiago sortzea.
- Eredu honetan oinarritzen diren enpresen bideragarritasun ekonomikoa bermatu eta hobetzea.
- Eredu honetan oinarritzen diren enpresen kontsumoan oinarrituko den merkatu sozial bat eraikitzea.

 

Proiektuak

ITUROLA

Iturola Eraldaketa Soziala helburu duten esperientzia sozioekonomikoen bilgunea da, Inteligentzia Kolektiborako Laborategia. Pertsonen arteko elkarlana ardatz, eta komunitatearen ongizatea helburu, proiektu sozioekonomikoak garatu, egonkortu eta hedatzeko baliabideak eskaintzen ditugu, Beterri-Buruntza eskualdeko ekintzaile eta eragileen artean sareak ehunduz, eta ideia, zerbitzu eta ezagutzen elkar-trukea sustatuz.

Iturola        

 

KOOPFABRIKA

Kooperatiba Fabrika proiektu profesional eta ekimen sozio-ekonomikoak martxan jartzen laguntzeko programa da. 2017an lehen aldiz abian jarri zenetik, 30 proiektutik gora sustatu dira.

Ekintzailetza sozial kooperatiboak ekintzailetza eredu desberdina jartzen du erdigunean: komunitatearen beharretatik abiatu eta komunitatean saretzen da, autoeraketan oinarritutako eredu demokratikoa da eta, proiektuaren bideragarritasunaz gain, bizigarritasuna ere hartzen du kontuan.

Lankidetzan sorturiko programa da KoopFabrika, izaera anitzeko eragileak saretzen dituena: Mondragon Unibertsitateko Lanki ikertegia, OlatuKoop sarea, REAS Euskadi sarea, Bagara, EHUko GEZKI Gizarte Ekonomia Zuzenbide Kooperatiboaren Institutua eta Debagoienako garapen agentzia, Beterri-Buruntzako udalak eta Oarsoaldea garapen agentzia, Mugarik Gabeko Ekonomialariak, Momentu, Worklan eta Grupo SSI . Gipuzkoako zein Bizkaiko Foru Aldundiek eta Eusko Jaurlaritzak babesturiko programa. Euskadi osoko proiektuei zabalik da KoopFabrika.

Koop Fabrika        

 

MAITELAN

Maitelan zaintza lanei kolektiboki erantzuteko tresna bat da. Horretarako, langile bazkideak (zaintzaileak), bazkide erabiltzaileak (zainduak) eta bazkide kolaboratzaileak bilduko dituen gizarte-ekimeneko kooperatiba integrala sortu dugu.

Maitelan      

 

BETERRI KM0

Eskualdeko nekazaritza ekoizpena kontsumitzaileen esku jartzeko helburuz jarri dute martxan proiektu hau Beterri-Buruntzako Udalek.

Hori lortzeko, bertako produktua janari dendetan, jantoki publikoetan zein taberna eta jatetxeetan saltzea erraztuko da. Leku hauek, Beterri Km0 zigiluarekin bereizi eta identifikatuko dira, kontsumitzaileak bertako produktua modu erraz batean eskuratu ahal izan dezan.

 

 

 

Beterri km0  

 

BETERRI SARETUZ

Beterri-Buruntza eskualdean 2019tik ari gara lanean hainbat enpresa eta eragile, ekonomia sozial eta eraldatzailearen bueltan, sare eta nodo eraginkor bat sortzeko helburuz.

Epe luzerako ikasketa prozesu bat da, eta estrategia horretan, lehen proiektuari ekingo diogu aurten: partaidetza oinarri duten enpresen ekosistema sortzea. Beterri saretuz deitu diogu programari, eta aurrera eramateko Gipuzkoako Foru Aldundiaren eta Beterri-Buruntza Udalen laguntza izan dugu..